---
title: "നേപ്പാൾ പ്രളയം: മരണസംഖ്യ 177 ആയി ഉയർന്നു; 53 മലയാളികൾ നോർക്കയുമായി ബന്ധപ്പെട്ടു"
english_title: "Nepal Flash Flood Death Toll 177 Malayalis Contacted Norka CM Office"
publisher: "malayorashabdam.in"
canonical_url: "https://malayorashabdam.truevisionnews.com/news/380121/nepal-flash-flood-death-toll-177-malayalis-contacted-norka"
published_at: "2026-08-27T14:57:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a90031e4313f_1000230749.jpg"
keywords: ["Nepal Flood", "Nepal Flash Flood", "Malayalis in Nepal", "Norka"]
---

# നേപ്പാൾ പ്രളയം: മരണസംഖ്യ 177 ആയി ഉയർന്നു; 53 മലയാളികൾ നോർക്കയുമായി ബന്ധപ്പെട്ടു

> **Lead Summary:** **തിരുവനന്തപുരം: **നേപ്പാളിലുണ്ടായ മിന്നൽ പ്രളയത്തിൽ മരണസംഖ്യ 177 ആയി ഉയർന്നു. ദുരന്തബാധിത മേഖലകളിൽ നേപ്പാൾ പ്രധാനമന്ത്രി ബലേന്ദ്ര ഷാ സന്ദർശനം നടത്തി. ആയിരക്കണക്കിന് ആളുകളെ കുറിച്ച് ഇപ്പോഴും വിവരമൊന്നുമില്ലെന്ന് അദ്ദേഹം വ്യക്തമാക്കി.

## Article Content

**തിരുവനന്തപുരം: **നേപ്പാളിലുണ്ടായ മിന്നൽ പ്രളയത്തിൽ മരണസംഖ്യ 177 ആയി ഉയർന്നു. ദുരന്തബാധിത മേഖലകളിൽ നേപ്പാൾ പ്രധാനമന്ത്രി ബലേന്ദ്ര ഷാ സന്ദർശനം നടത്തി. ആയിരക്കണക്കിന് ആളുകളെ കുറിച്ച് ഇപ്പോഴും വിവരമൊന്നുമില്ലെന്ന് അദ്ദേഹം വ്യക്തമാക്കി.

അതിനിടെ, ദുരിതബാധിത പ്രദേശങ്ങളിൽ നിന്ന് 53 മലയാളികൾ നോർക്കയുമായും മുഖ്യമന്ത്രിയുടെ ഓഫീസുമായും ബന്ധപ്പെട്ടതായി നോർക്ക സിഇഒ വാർത്താ സമ്മേളനത്തിൽ അറിയിച്ചു. മലയാളികൾ പലരും ഒറ്റപ്പെട്ട സ്ഥലങ്ങളിലാണുള്ളത്. എന്നാൽ, വാർത്താവിനിമയ സംവിധാനങ്ങൾ പൂർണ്ണമായി തകർന്നതിനാൽ ഇവർ നിലവിൽ ഏത് സ്ഥലത്താണ് കുടുങ്ങിക്കിടക്കുന്നതെന്ന് കൃത്യമായി സ്ഥിരീകരിക്കാൻ സാധിച്ചിട്ടില്ല.

എങ്കിലും നിലവിൽ ആശങ്കപ്പെടേണ്ട സാഹചര്യമില്ലെന്നാണ് നോർക്ക വ്യക്തമാക്കുന്നത്. വിസ ആവശ്യമില്ലാത്ത രാജ്യമായതിനാൽ സ്വന്തമായി യാത്ര തിരിച്ച് നേപ്പാളിലെത്തിയ സംഘങ്ങളിൽ ആരെങ്കിലും കുടുങ്ങിക്കിടക്കുന്നുണ്ടോ എന്ന് കണ്ടെത്താനുള്ള ശ്രമങ്ങൾ പുരോഗമിക്കുകയാണ്.

ഓണം അവധിക്കാലമായതിനാൽ നിരവധി മലയാളികൾ കുടുംബത്തോടും സുഹൃത്തുക്കളോടുമൊപ്പം വിനോദസഞ്ചാരത്തിനായി നേപ്പാളിൽ എത്തിയിട്ടുണ്ടാകാമെന്നാണ് അധികൃതരുടെ പ്രാഥമിക വിലയിരുത്തൽ. സംസ്ഥാന സർക്കാരും നോർക്കയും സ്ഥിതിഗതികൾ സൂക്ഷ്മമായി നിരീക്ഷിച്ചു വരികയാണ്.

### Related Links & Sources
- [Original Story Source](https://malayorashabdam.truevisionnews.com/news/380121/nepal-flash-flood-death-toll-177-malayalis-contacted-norka)