---
title: "പ്രശസ്ത നാടക, ചലച്ചിത്ര നടി സാവിത്രി ശ്രീധരൻ അന്തരിച്ചു; വിടവാങ്ങിയത് 'സുഡാനി'യിലെ പ്രിയപ്പെട്ട ഉമ്മ"
english_title: "Veteran Actress Savithri Sreedharan Passes Away: Malayalam Cinema and Theatre Loss"
publisher: "malayorashabdam.in"
canonical_url: "https://malayorashabdam.truevisionnews.com/news/383887/veteran-actress-savithri-sreedharan-passes-away-malayalam-cinema-and-theatre-loss"
published_at: "2026-09-23T11:36:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ab36c714e06f_WhatsApp_Image_2026-09-23_at_11.05.54_AM.jpeg"
keywords: ["Savithri Sreedharan Passed Away", "Sudani From Nigeria Umma", "Kozhikode News", "Malayalam Cinema News"]
---

# പ്രശസ്ത നാടക, ചലച്ചിത്ര നടി സാവിത്രി ശ്രീധരൻ അന്തരിച്ചു; വിടവാങ്ങിയത് 'സുഡാനി'യിലെ പ്രിയപ്പെട്ട ഉമ്മ

> **Lead Summary:** **കോഴിക്കോട്: **നാടക രംഗത്തും ചലച്ചിത്ര ലോകത്തും തന്റേതായ വ്യക്തിമുദ്ര പതിപ്പിച്ച പ്രശസ്ത നടി സാവിത്രി ശ്രീധരൻ അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് കോഴിക്കോട് മാങ്കാവിലെ സ്വവസതിയിൽ ഏറെ നാളായി വിശ്രമത്തിലായിരുന്നു.

## Article Content

**കോഴിക്കോട്: **നാടക രംഗത്തും ചലച്ചിത്ര ലോകത്തും തന്റേതായ വ്യക്തിമുദ്ര പതിപ്പിച്ച പ്രശസ്ത നടി സാവിത്രി ശ്രീധരൻ അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് കോഴിക്കോട് മാങ്കാവിലെ സ്വവസതിയിൽ ഏറെ നാളായി വിശ്രമത്തിലായിരുന്നു.

അഞ്ചു പതിറ്റാണ്ടിലേറെക്കാലം പ്രൊഫഷണൽ നാടക വേദികളിൽ സജീവ സാന്നിധ്യമായിരുന്ന അവർ, 'സുഡാനി ഫ്രം നൈജീരിയ' എന്ന സിനിമയിലെ ഉമ്മയുടെ കഥാപാത്രത്തിലൂടെയാണ് മലയാളി പ്രേക്ഷകരുടെ മനസ്സിൽ ചിരപ്രതിഷ്ഠ നേടിയത്. 1961-ൽ നാടകങ്ങളിലൂടെയാണ് സാവിത്രി ശ്രീധരൻ അഭിനയ രംഗത്തേക്ക് കടന്നുവരുന്നത്.

പ്രമുഖ നാടകകൃത്ത് കെ.ടി. മുഹമ്മദിന്റെ കലിംഗ നാടക തിയേറ്റേഴ്സ്, കോഴിക്കോട് ചിരന്തന, സംഗമം, സ്റ്റേജ് ഓഫ് ഇന്ത്യ എന്നീ പ്രശസ്ത സമിതികളുടെ നിരവധി നാടകങ്ങളിൽ ശ്രദ്ധേയമായ നായികാവേഷങ്ങൾ അവർ കൈകാര്യം ചെയ്തു. നാടകരംഗത്തെ മികച്ച പ്രകടനങ്ങൾക്ക് 1977-ലും 1993-ലും സംസ്ഥാന സർക്കാരിന്റെ മികച്ച നാടക നടിക്കുള്ള പുരസ്കാരവും കേരള സംഗീത നാടക അക്കാദമി അവാർഡും നേടിയിട്ടുണ്ട്.

പ്രശസ്ത സാഹിത്യകാരൻ എം.ടി. വാസുദേവൻ നായർ രചനയും സംവിധാനവും നിർവ്വഹിച്ച 'കടവ്' എന്ന ചിത്രത്തിലൂടെയാണ് സാവിത്രി ശ്രീധരൻ സിനിമയിൽ അരങ്ങേറ്റം കുറിക്കുന്നത്. തുടർന്ന് 'വലിയങ്ങാടി', 'ഡാകിനി', 'മേരാ നാം ഷാജി', 'വൈറസ്', 'ഇട്ടിമാണി മേഡ് ഇൻ ചൈന' തുടങ്ങിയ ഒട്ടേറെ ചിത്രങ്ങളിൽ അഭിനയിച്ചു. സക്കറിയ സംവിധാനം ചെയ്ത 'സുഡാനി ഫ്രം നൈജീരിയ' എന്ന ചിത്രത്തിലെ പ്രകടനം മികച്ച സഹനടിക്കുള്ള സംസ്ഥാന ചലച്ചിത്ര പുരസ്കാരത്തിനും ദേശീയ ചലച്ചിത്ര അവാർഡിലെ പ്രത്യേക പരാമർശത്തിനും (Special Mention) അവരെ അർഹയാക്കി. അവരുടെ നിര്യാണത്തിൽ സാംസ്കാരിക, ചലച്ചിത്ര രംഗത്തെ പ്രമുഖർ അനുശോചനം രേഖപ്പെടുത്തി.

### Related Links & Sources
- [Original Story Source](https://malayorashabdam.truevisionnews.com/news/383887/veteran-actress-savithri-sreedharan-passes-away-malayalam-cinema-and-theatre-loss)