---
title: "ഞായറാഴ്ച ബാങ്കുകൾ പ്രവർത്തിക്കും; തീരുമാനം മൂന്ന് ദിവസത്തെ പണിമുടക്കിന്റെ പശ്ചാത്തലത്തിൽ"
english_title: "Banks Open Sunday September 27 2026 Strike UFBU Three Day Bank Strike RBI Permission"
publisher: "malayorashabdam.in"
canonical_url: "https://malayorashabdam.truevisionnews.com/news/383920/banks-open-sunday-september-27-2026-three-day-strike-ufbu"
published_at: "2026-09-23T15:25:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ab3a268c4d08_1000235603.jpg"
keywords: ["Banks Open Sunday", "Bank Strike September 28-30", "UFBU Strike", "RBI Permission Banks Sunday"]
---

# ഞായറാഴ്ച ബാങ്കുകൾ പ്രവർത്തിക്കും; തീരുമാനം മൂന്ന് ദിവസത്തെ പണിമുടക്കിന്റെ പശ്ചാത്തലത്തിൽ

> **Lead Summary:** **ന്യൂഡൽഹി: **അടുത്ത ഞായറാഴ്ച രാജ്യത്തെ ബാങ്കുകൾ തുറന്ന് പ്രവർത്തിക്കും. 28-ാം തീയതി മുതൽ മൂന്ന് ദിവസം ബാങ്ക് ജീവനക്കാർ പണിമുടക്ക് പ്രഖ്യാപിച്ച സാഹചര്യത്തിലാണ് കേന്ദ്രസർക്കാരിന്റെ തീരുമാനം. ഞായറാഴ്ച ബാങ്കുകൾ തുറന്നു പ്രവർത്തിക്കുന്നതിന് റിസർവ് ബാങ്ക് അനുമതി നൽകി.

## Article Content

**ന്യൂഡൽഹി: **അടുത്ത ഞായറാഴ്ച രാജ്യത്തെ ബാങ്കുകൾ തുറന്ന് പ്രവർത്തിക്കും. 28-ാം തീയതി മുതൽ മൂന്ന് ദിവസം ബാങ്ക് ജീവനക്കാർ പണിമുടക്ക് പ്രഖ്യാപിച്ച സാഹചര്യത്തിലാണ് കേന്ദ്രസർക്കാരിന്റെ തീരുമാനം. ഞായറാഴ്ച ബാങ്കുകൾ തുറന്നു പ്രവർത്തിക്കുന്നതിന് റിസർവ് ബാങ്ക് അനുമതി നൽകി.

സെപ്റ്റംബർ 28 മുതൽ 30 വരെയാണ് പണിമുടക്ക് പ്രഖ്യാപിച്ചിരുന്നത്. ഇതിനു തൊട്ടുമുൻപുള്ള രണ്ടു ദിവസങ്ങൾ നാലാം ശനിയാഴ്ചയും ഞായറാഴ്ചയുമായതിനാൽ ഫലത്തിൽ അഞ്ച് ദിവസം ബാങ്കിംഗ് സേവനങ്ങൾ തടസ്സപ്പെടുന്ന സാഹചര്യം കണക്കിലെടുത്താണ് ഞായറാഴ്ച ബാങ്കുകൾ തുറന്ന് പ്രവർത്തിക്കാൻ കേന്ദ്രസർക്കാർ തീരുമാനിച്ചത്.

ബാങ്ക് ജീവനക്കാരുടെ സംഘടനകളുടെ ഐക്യവേദിയായ യുണൈറ്റഡ് ഫോറം ഓഫ് ബാങ്ക് യൂണിയൻസാണ് (യു.എഫ്.ബി.യു.) പണിമുടക്കിന് ആഹ്വാനം ചെയ്തത്. സെപ്റ്റംബർ 28 തിങ്കൾ മുതൽ 30 ബുധൻ വരെയാണ് പണിമുടക്ക്. സെപ്റ്റംബർ 30 ബാങ്കുകളുടെ അർധവാർഷിക കണക്കെടുപ്പ് നടക്കുന്ന ദിവസമാണ്.

ട്രഷറി പ്രവർത്തനങ്ങൾ ഉൾപ്പെടെയുള്ളവയ്ക്ക് ഈ തീയതി നിർണായകമാണ്. പണിമുടക്ക് ബാങ്കുകളുടെ കണക്കെടുപ്പുകളെയും വിപണി ക്രമീകരണങ്ങളെയും ബാധിച്ചേക്കാം.

പണിമുടക്കിന്റെ പശ്ചാത്തലത്തിൽ ബാങ്കിംഗ് ഇടപാടുകൾ മുൻകൂട്ടി പൂർത്തിയാക്കാനും ഡിജിറ്റൽ സേവനങ്ങൾ ഉപയോഗിക്കാനും ഉപഭോക്താക്കൾക്ക് ബാങ്കുകൾ നിർദേശം നൽകി. സമരം പരിഗണിച്ച് എടിഎമ്മുകളിൽ പണം നിറയ്ക്കാൻ നടപടി സ്വീകരിച്ചതായി ബാങ്കുകൾ അറിയിച്ചു.

ഉപഭോക്താക്കളുടെ ആശങ്ക പരിഹരിക്കാൻ എസ്.ബി.ഐ., ബാങ്ക് ഓഫ് ബറോഡ, കനറാ ബാങ്ക് ഉൾപ്പെടെയുള്ളവ ജാഗ്രതാ നിർദേശം നൽകിയിട്ടുണ്ട്. ബ്രാഞ്ചുകളിലെ സേവനങ്ങൾ തടസ്സപ്പെടുമെങ്കിലും ഡിജിറ്റൽ, എടിഎം ഇടപാടുകൾ നടത്താമെന്ന് ബാങ്കുകൾ അറിയിച്ചു.

### Related Links & Sources
- [Original Story Source](https://malayorashabdam.truevisionnews.com/news/383920/banks-open-sunday-september-27-2026-three-day-strike-ufbu)