---
title: "‘സ്ത്രീ പീഡകരെ പാർട്ടി സംരക്ഷിക്കില്ല’; നിലപാടിൽ ഉറച്ച് പി കെ ശ്രീമതി"
english_title: "New Delhi Women Abusers Party Will Not Protect Repeated CPI M Central Committee Member PK Sreemathy Teacher Action Taken Against Atrocity Women Girls Continue Tradition Strong Action Cyber Attack"
publisher: "malayorashabdam.in"
canonical_url: "https://malayorashabdam.truevisionnews.com/news/386091/women-abusers-party-will-not-protect-pk-sreemathy-stand-cpm-palakkad-en-suresh-babu"
published_at: "2026-10-08T13:56:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6ac75445ba1c5_1000238704.jpg"
keywords: ["New Delhi Women Abusers Party Will Not Protect  Repeated CPI M Central Committee Member PK Sreemathy", "Party Working Women Girls Whoever Shows Atrocity Action Taken", "Continue Same PK Sreemathy Teacher Said Atrocity Showers Party Will Not Protect"]
---

# ‘സ്ത്രീ പീഡകരെ പാർട്ടി സംരക്ഷിക്കില്ല’; നിലപാടിൽ ഉറച്ച് പി കെ ശ്രീമതി

> **Lead Summary:** **ന്യൂഡൽഹി: **സ്ത്രീ പീഡകരെ പാർട്ടി സംരക്ഷിക്കില്ലെന്ന് ആവർത്തിച്ച് സിപിഐഎം കേന്ദ്രകമ്മിറ്റി അംഗം പി കെ ശ്രീമതി. താൻ പ്രവർത്തിക്കുന്ന പാർട്ടിയിൽ സ്ത്രീകൾക്കെതിരെയും പെൺകുട്ടികൾക്കെതിരെയും ആർ അതിക്രമം കാണിച്ചാലും അവർക്കെതിരെ നടപടി സ്വീകരിച്ചിട്ടുണ്ടെന്നും ഇനിയും അത് അങ്ങനെ തന്നെ തുടരുമെന്നും പി കെ ശ്രീമതി ടീച്ചർ പറഞ്ഞു.

## Article Content

**ന്യൂഡൽഹി: **സ്ത്രീ പീഡകരെ പാർട്ടി സംരക്ഷിക്കില്ലെന്ന് ആവർത്തിച്ച് സിപിഐഎം കേന്ദ്രകമ്മിറ്റി അംഗം പി കെ ശ്രീമതി. താൻ പ്രവർത്തിക്കുന്ന പാർട്ടിയിൽ സ്ത്രീകൾക്കെതിരെയും പെൺകുട്ടികൾക്കെതിരെയും ആർ അതിക്രമം കാണിച്ചാലും അവർക്കെതിരെ നടപടി സ്വീകരിച്ചിട്ടുണ്ടെന്നും ഇനിയും അത് അങ്ങനെ തന്നെ തുടരുമെന്നും പി കെ ശ്രീമതി ടീച്ചർ പറഞ്ഞു.

അതിക്രമം കാണിച്ചവരെ പാർട്ടി സംരക്ഷിക്കില്ലെന്നും ശക്തമായ നടപടി സ്വീകരിക്കുമെന്ന നിലപാടിലുറച്ചാണ് പി കെ ശ്രീമതി പ്രതികരിച്ചത്. പാർട്ടിയുടെ പാരമ്പര്യം അനുസരിച്ച് നടപടി എടുക്കുമെന്നും ശ്രീമതി ടീച്ചർ വ്യക്തമാക്കി.

തനിക്ക് എതിരെ സൈബർ ആക്രമണം രൂക്ഷമാണെന്നും എ കെ ബാലനുമായുള്ള ഫോട്ടോ ഉപയോഗിച്ച് ചോദ്യങ്ങൾ ഉയർത്തുകയാണെന്നും പി കെ ശ്രീമതി ചൂണ്ടിക്കാട്ടി. ഡൽഹിയിൽ മാധ്യമങ്ങളോട് നടത്തിയ പ്രതികരണത്തിലാണ് പി കെ ശ്രീമതി നിലപാട് വീണ്ടും ആവർത്തിച്ച് വ്യക്തമാക്കിയത്.

‘സുരേഷ് ബാബു എന്നല്ല മറ്റ് A or B ആണെങ്കിലും പാർട്ടി ആരെയും സംരക്ഷിക്കില്ല’ എന്നും പി കെ ശ്രീമതി കൂട്ടിച്ചേർത്തു. സ്ത്രീ പീഡകർ എത്ര ഉന്നതരായാലും നിർദാക്ഷണ്യം നടപടിയെടുത്ത പാരമ്പര്യം മാത്രമാണ് സിപിഐഎമ്മിനുള്ളതെന്ന് പി കെ ശ്രീമതി കഴിഞ്ഞ ദിവസം വ്യക്തമാക്കിയിരുന്നു.

ആരോപണം നേരിടുന്ന ഇ എൻ സുരേഷ് ബാബുവിനെ പാലക്കാട് ജില്ലാ സെക്രട്ടറി സ്ഥാനത്ത് നിന്നും നീക്കിയതിൽ സംസ്ഥാന നേതൃത്വം വ്യക്തത വരുത്താത്ത പശ്ചാത്തലം മുന്നിലുണ്ട്. അതിനിടെയാണ് നേതൃത്വത്തെ ഉന്നം വെച്ച് ഫേസ്ബുക്ക് കുറിപ്പിലൂടെ പരസ്യമായി പി കെ ശ്രീമതി രംഗത്തെത്തിയത്.

‘ഒരു കാര്യം ഞാൻ വ്യക്തമാക്കാം. പെൺകുട്ടികളെയോ സ്ത്രീകളെയോ പീഡിപ്പിച്ചവർ എത്ര ഉന്നതരായാലും അവർക്കെതിരെ നിർദ്ദാക്ഷണ്യം നടപടി എടുത്ത പാരമ്പര്യം മാത്രമേ സിപിഐഎമ്മിനുള്ളു. അത് ഇനിയും ഓർക്കാത്തവരുണ്ടെങ്കിൽ ”വിനാശകാലെ വിപരീതബുദ്ധി ”എന്ന് മാത്രേ ഇപ്പോൾ പറയാൻ കഴിയൂ’, എന്ന ഫേസ്ബുക്ക് കുറിപ്പ് പങ്കുവെച്ചാണ് പി കെ ശ്രീമതി രംഗത്ത് വന്നത്.

സിപിഐഎം വിപുലീകൃത ജില്ലാ കമ്മിറ്റി പാലക്കാട് അവസാനിച്ചതിന് പിന്നാലെയായിരുന്നു ഇ എൻ സുരേഷ് ബാബുവിനെ ജില്ലാ സെക്രട്ടറി സ്ഥാനത്ത് നിന്നും മാറ്റി പകരം വി ചെന്താമരാക്ഷനെ ജില്ലാ സെക്രട്ടറി ആക്കിയത്. താൻ വ്യക്തിപരമായ കാരണങ്ങളാലാണ് ഒഴിയുന്നതെന്ന് സുരേഷ് ബാബു പറഞ്ഞിരുന്നെങ്കിലും വനിതാ അഭിഭാഷകയുടെ പരാതിയിലാണ് നടപടി എന്ന് വാർത്ത വന്നിരുന്നു.

സുരേഷ് ബാബുവിനെതിരായ നടപടി എം വി ഗോവിന്ദൻ തള്ളിയിരുന്നെങ്കിലും പരോക്ഷമായി സ്ഥിരീകരിക്കുന്ന നിലപാടാണ് എൻ കൃഷ്ണദാസ് ഉൾപ്പെടെയുള്ള നേതാക്കളിൽ നിന്നുണ്ടായത്. ഇതോടെയാണ് വിഷയം ചർച്ചയാകുന്നത്.

### Related Links & Sources
- [Original Story Source](https://malayorashabdam.truevisionnews.com/news/386091/women-abusers-party-will-not-protect-pk-sreemathy-stand-cpm-palakkad-en-suresh-babu)