---
title: "പിണറായിക്കും റിയാസിനുമെതിരെ അന്വേഷണം: രണ്ട് എസ്ഐടി രൂപീകരിച്ച് വിജിലൻസ് ഉത്തരവ്"
english_title: "Vigilance Forms Two SiT Against Pinarayi Vijayan Mohammed Riyas Veena ED Report"
publisher: "malayorashabdam.in"
canonical_url: "https://malayorashabdam.truevisionnews.com/news/387027/vigilance-forms-two-sit-against-pinarayi-vijayan-mohammed-riyas-veena-ed-report"
published_at: "2026-10-14T13:35:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6acf384774d5e_1000345026.jpg"
keywords: ["Pinarayi-vijjayan", "Muhammadriyas"]
---

# പിണറായിക്കും റിയാസിനുമെതിരെ അന്വേഷണം: രണ്ട് എസ്ഐടി രൂപീകരിച്ച് വിജിലൻസ് ഉത്തരവ്

> **Lead Summary:** **തിരുവനന്തപുരം**: മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനും മുൻമന്ത്രി മുഹമ്മദ് റിയാസിനുമെതിരായ വിജിലൻസ് അന്വേഷണത്തിന് രണ്ട് പ്രത്യേക സംഘങ്ങളെ രൂപീകരിച്ച് ഡയറക്ടർ ഉത്തരവിട്ടു. ഡിഐജി തോംസൺ ജോസിനാണ് അന്വേഷണത്തിന്റെ മേൽനോട്ടം.

## Article Content

**തിരുവനന്തപുരം**: മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനും മുൻമന്ത്രി മുഹമ്മദ് റിയാസിനുമെതിരായ വിജിലൻസ് അന്വേഷണത്തിന് രണ്ട് പ്രത്യേക സംഘങ്ങളെ രൂപീകരിച്ച് ഡയറക്ടർ ഉത്തരവിട്ടു. ഡിഐജി തോംസൺ ജോസിനാണ് അന്വേഷണത്തിന്റെ മേൽനോട്ടം.

പിണറായി വിജയൻ ഒന്നാം പ്രതിയായ കേസ് എസ്പി ഇ.എൻ സുരേഷും മുഹമ്മദ് റിയാസ് ഒന്നാം പ്രതിയായ കേസ് കോഴിക്കോട് സ്പെഷ്യൽ സെൽ എസ്പി ബാലകൃഷ്ണനും അന്വേഷിക്കും. ഇഡി റിപ്പോർട്ട് പ്രകാരം, രണ്ട് കാലഘട്ടങ്ങളിൽ നടന്ന സാമ്പത്തിക ആരോപണങ്ങളായതിനാലാണ് രണ്ട് കേസുകൾ രജിസ്റ്റർ ചെയ്തത്. അഴിമതി തടയൽ നിയമപ്രകാരമെടുത്ത രണ്ട് കേസിലും പിണറായിയുടെ മകൾ വീണ രണ്ടാം പ്രതിയാണ്.

ഹൈക്കോടതി ഉത്തരവിനെ തുടർന്ന് ഇഡി റിപ്പോർട്ടിന്റെ അടിസ്ഥാനത്തിലാണ് വിജിലൻസ് രണ്ട് കേസുകളെടുത്തത്. പിണറായിയും മുഹമ്മദ് റിയാസും അധികാരം ദുരുപയോഗം ചെയ്ത് പണമുണ്ടാക്കിയെന്നാണ് എഫ്ഐആറുകൾ പറയുന്നത്. ഒന്നാം പിണറായി സർക്കാരിന്റെ കാലത്ത് ടി. വീണ സ്വന്തം കമ്പനിയായ എക്സാലോജിക് വഴി സിഎംആർഎല്ലിൽ നിന്ന് മാസപ്പടി വാങ്ങിയെന്നതാണ് ആദ്യ കേസ്. നൽകാത്ത സേവനത്തിനാണ് 3.28 കോടി വാങ്ങിയത്.

ഇങ്ങനെ പണം നൽകാൻ കാരണം രാഷ്ട്രീയ സ്വാധീനമാണ്. ഇത് പിണറായിക്കുള്ള കൈക്കൂലിയെന്നാണ് ഇഡി ആരോപണം. അതിനാൽ വിജിലൻസ് എടുത്ത ആദ്യ കേസിൽ പിണറായി ഒന്നാം പ്രതിയും മകൾ രണ്ടാം പ്രതിയുമാണ്. സിഎംആർഎൽ കമ്പനി ഉടമ ശശിധരൻ കർത്ത ഉൾപ്പെടെ ഏഴ് പ്രതികളാണ് ഈ കേസിലുള്ളത്.

മന്ത്രിയായിരിക്കെ മുഹമ്മദ് റിയാസ് അനധികൃതമായി ഉണ്ടാക്കിയ പണം ഹവാല വഴി വിദേശത്തേക്ക് കടത്തിയെന്ന ഇഡി കണ്ടെത്തലിലാണ് രണ്ടാമത്തെ കേസ്. ഇതിലും വീണയാണ് രണ്ടാം പ്രതി. ഇരുവരും ചേർന്ന് റിയാസിന്റെ സുഹൃത്തുക്കളുമായി ഗൂഢാലോചന നടത്തി യുഎഇയിലേക്ക് ഇടനിലക്കാർ വഴി പണം കടത്തി. 85 ലക്ഷം വിദേശത്തേക്ക് അയച്ചു. വീണയുടെ വസതിയിൽ നിന്ന് ഇഡി പിടിച്ചെടുത്ത കയ്യെഴുത്ത് കുറിപ്പുകളാണ് ഇതിന് തെളിവ്.

ദുബായിൽ വസ്ത്ര കയറ്റുമതി ബിസിനസിനുള്ള ചർച്ച പ്രതികൾ തമ്മിൽ നടത്തിയിരുന്നു. റിയാസിന്റെ സുഹൃത്തുക്കൾ ഉൾപ്പെടെ ആകെ 8 പ്രതികളാണ് ഈ കേസിലുള്ളത്. മുഹമ്മദ് റിയാസിന്റെ സുഹൃത്തുക്കളുടെ മൊഴി ഉൾപ്പെടെ എല്ലാ രേഖകളും ക്രൈംബ്രാഞ്ച് എസ്ഐടിയും വിജിലൻസിന് കൈമാറിയിട്ടുണ്ട്.

### Related Links & Sources
- [Original Story Source](https://malayorashabdam.truevisionnews.com/news/387027/vigilance-forms-two-sit-against-pinarayi-vijayan-mohammed-riyas-veena-ed-report)