---
title: "ആഗോള ബോക്സ് ഓഫീസിൽ തരംഗമായി 'രാമായണം; 1389 കോടി കടന്ന് കുതിപ്പ്, 'ധുരന്ധറി'നെയും 'കൽക്കി'യെയും മറികടന്നു"
english_title: "Ramayana Part 1 Box Office Collection: Crosses Rs 1389 Crore Worldwide, Beats Kalki and Dhurandhar"
publisher: "malayorashabdam.in"
canonical_url: "https://malayorashabdam.truevisionnews.com/news/391968/ramayana-part-1-worldwide-box-office-collection-crosses-1384-crore"
published_at: "2026-11-17T12:13:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6afbfaed56024_891790181_28923382564022308_1949304107662482088_n.jpg"
keywords: ["RAMAYANA"]
---

# ആഗോള ബോക്സ് ഓഫീസിൽ തരംഗമായി 'രാമായണം; 1389 കോടി കടന്ന് കുതിപ്പ്, 'ധുരന്ധറി'നെയും 'കൽക്കി'യെയും മറികടന്നു

> **Lead Summary:** മുംബൈ: നിതേഷ് തിവാരിയുടെ സംവിധാനത്തിൽ രൺബീർ കപൂർ, സായ് പല്ലവി, യാഷ്, രവി ദുബെ എന്നിവർ പ്രധാന വേഷങ്ങളിലെത്തിയ 'രാമായണം: പാർട്ട് 1' ലോകമെമ്പാടുമുള്ള ബോക്സ് ഓഫീസിൽ വമ്പൻ കുതിപ്പ് തുടരുന്നു. ചിത്രത്തിന് ആഗോളതലത്തിൽ സമ്മിശ്ര പ്രതികരണങ്ങളാണ് ലഭിച്ചതെങ്കിലും അതൊന്നും ബോക്സ് ഓഫീസ് കളക്ഷനെ ബാധിച്ചിട്ടില്ല. വാരാന്ത്യത്തിലെ മികച്ച പ്രകടനത്തോടെ ചിത്രം ആഗോളതലത്തിൽ 1389 കോടിയിലധികം രൂപ കളക്ഷൻ നേടി. ഇതോടെ ആദിത്യ ധർ സംവിധാനം ചെയ്ത രൺവീർ സിംഗ് ചിത്രം 'ധുരന്ധറി'ന്റെ ആജീവനാന്ത കളക്ഷനെ 'രാമായണം' മറികടന്നു. 'കൽക്കി 2898 എഡി', 'ജവാൻ', 'കെജിഎഫ്: ചാപ്റ്റർ 2' തുടങ്ങിയ വമ്പൻ ചിത്രങ്ങളുടെ റെക്കോർഡുകളും ഇതിനോടകം തന്നെ ചിത്രം തകർത്തു കഴിഞ്ഞു.

## Article Content

മുംബൈ: നിതേഷ് തിവാരിയുടെ സംവിധാനത്തിൽ രൺബീർ കപൂർ, സായ് പല്ലവി, യാഷ്, രവി ദുബെ എന്നിവർ പ്രധാന വേഷങ്ങളിലെത്തിയ 'രാമായണം: പാർട്ട് 1' ലോകമെമ്പാടുമുള്ള ബോക്സ് ഓഫീസിൽ വമ്പൻ കുതിപ്പ് തുടരുന്നു. ചിത്രത്തിന് ആഗോളതലത്തിൽ സമ്മിശ്ര പ്രതികരണങ്ങളാണ് ലഭിച്ചതെങ്കിലും അതൊന്നും ബോക്സ് ഓഫീസ് കളക്ഷനെ ബാധിച്ചിട്ടില്ല. വാരാന്ത്യത്തിലെ മികച്ച പ്രകടനത്തോടെ ചിത്രം ആഗോളതലത്തിൽ 1389 കോടിയിലധികം രൂപ കളക്ഷൻ നേടി. ഇതോടെ ആദിത്യ ധർ സംവിധാനം ചെയ്ത രൺവീർ സിംഗ് ചിത്രം 'ധുരന്ധറി'ന്റെ ആജീവനാന്ത കളക്ഷനെ 'രാമായണം' മറികടന്നു. 'കൽക്കി 2898 എഡി', 'ജവാൻ', 'കെജിഎഫ്: ചാപ്റ്റർ 2' തുടങ്ങിയ വമ്പൻ ചിത്രങ്ങളുടെ റെക്കോർഡുകളും ഇതിനോടകം തന്നെ ചിത്രം തകർത്തു കഴിഞ്ഞു.

ആഗോള ബോക്സ് ഓഫീസ് കണക്കുകൾ ഇങ്ങനെ: റിലീസ് ചെയ്ത് പതിനൊന്നാം ദിവസമായ രണ്ടാം ഞായറാഴ്ച ഇന്ത്യൻ ബോക്സ് ഓഫീസിൽ നിന്ന് 75 കോടി രൂപ നെറ്റ് കളക്ഷനും 89.50 കോടി രൂപ ഗ്രോസ് കളക്ഷനുമാണ് ചിത്രം സ്വന്തമാക്കിയത്. ട്രേഡ് വെബ്സൈറ്റായ സാക്നിൽക്കിന്റെ (Sacnilk) കണക്കുകൾ പ്രകാരം, ഇതോടെ ചിത്രത്തിന്റെ ആകെ ഇന്ത്യൻ നെറ്റ് കളക്ഷൻ 760.60 കോടി രൂപയായും ഗ്രോസ് കളക്ഷൻ 909 കോടി രൂപയായും ഉയർന്നു. വിദേശ മാർക്കറ്റുകളിൽ നിന്ന് ഞായറാഴ്ച മാത്രം ലഭിച്ച 40 കോടി രൂപ ഉൾപ്പെടെ ഇതുവരെ 475.50 കോടി രൂപയാണ് ചിത്രം നേടിയത്. ഇതോടെ 'രാമായണ'ത്തിന്റെ ആകെ ആഗോള ഗ്രോസ് കളക്ഷൻ 1389.50 കോടി രൂപയിലെത്തി.

ഈ നേട്ടത്തോടെ, 1000 കോടി ക്ലബ്ബിൽ ഇടംപിടിക്കുന്ന പതിനൊന്നാമത്തെ ഇന്ത്യൻ ചിത്രമായി 'രാമായണം' മാറി. നിലവിൽ ദംഗൽ (2000 കോടി), പുഷ്പ 2: ദി റൂൾ (1871 കോടി), ധുരന്ധർ: ദി റിവഞ്ച് (1813 കോടി), ബാഹുബലി 2: ദി കൺക്ലൂഷൻ (1788 കോടി) എന്നീ ചിത്രങ്ങൾ മാത്രമാണ് കളക്ഷനിൽ രാമായണത്തിന് മുന്നിലുള്ളത്. 1307.35 കോടി രൂപയായിരുന്ന 'ധുരന്ധറി'ന്റെ ആജീവനാന്ത കളക്ഷനെയാണ് ചിത്രം മറികടന്നത്. ആർആർആർ (1230 കോടി), കെജിഎഫ് 2 (1215 കോടി), ജവാൻ (1160 കോടി), പഠാൻ (1055 കോടി), കൽക്കി 2898 എഡി (1042.25 കോടി) എന്നീ ചിത്രങ്ങളെയും രാമായണം പിന്നിലാക്കി.

 വിദേശ രാജ്യങ്ങളിൽ 'രാമായണം: റൈസ് ഓഫ് എ ലെജൻഡ്' (Ramayana: Rise of a Legend) എന്ന പേരിൽ റിലീസ് ചെയ്ത ചിത്രത്തിന്റെ തിരക്കഥ നിതേഷ് തിവാരിയും ശ്രീധർ രാഘവനും ചേർന്നാണ് ഒരുക്കിയിരിക്കുന്നത്. നമിത് മൽഹോത്രയും യാഷും ചേർന്നാണ് ചിത്രം നിർമ്മിച്ചിരിക്കുന്നത്. വാൽമീകി രാമായണം ഉൾപ്പെടെയുള്ള വിവിധ ഇതിഹാസ ആഖ്യാനങ്ങളെ ആസ്പദമാക്കിയാണ് ചിത്രം നിർമ്മിച്ചിരിക്കുന്നത്. ചിത്രത്തിൽ ശ്രീരാമനായി രൺബീർ കപൂറും, സീതയായി സായ് പല്ലവിയും, രാവണനായി യാഷും, ലക്ഷ്മണനായി രവി ദുബെയും വേഷമിടുന്നു.

രാമന്റെയും രാവണന്റെയും ബാല്യകാലം മുതൽ യൗവനം വരെയുള്ള യാത്രയും, 14 വർഷത്തെ വനവാസവും, സീതാപഹരണവുമാണ് ആദ്യ ഭാഗത്തിൽ ചിത്രീകരിച്ചിരിക്കുന്നത്. കാജൽ അഗർവാൾ, രാകുൽ പ്രീത് സിംഗ്, വിവേക് ഒബ്‌റോയ്, കുനാൽ കപൂർ, ആദിനാഥ് കോത്താരെ, അരുൺ ഗോവിൽ, ഇന്ദിര കൃഷ്ണൻ, ലാറ ദത്ത എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. രണ്ടാം ഭാഗത്തിനുള്ള കൃത്യമായ സൂചനകൾ നൽകിക്കൊണ്ടാണ് 'രാമായണം: പാർട്ട് 1' അവസാനിക്കുന്നത്. 2028 ദീപാവലി റിലീസായി എത്തുന്ന 'രാമായണം: പാർട്ട് 2'-ൽ സണ്ണി ഡിയോൾ ഹനുമാനായി വേഷമിടും.

### Related Links & Sources
- [Original Story Source](https://malayorashabdam.truevisionnews.com/news/391968/ramayana-part-1-worldwide-box-office-collection-crosses-1384-crore)