കണ്ണൂർ: കുഞ്ഞുങ്ങളിൽ ഗർഭാവസ്ഥയിൽ തന്നെ രൂപംകൊള്ളുന്ന തലയോട്ടിയുടെ വളർച്ചയിലെ ജന്മനാ വൈകല്യമായ ക്രാനിയോസിനോസ്റ്റോസിസ് രോഗത്തിന് ആധുനിക ശസ്ത്രക്രിയയായ FOAR (Front Orbital Advancement and Reconstruction) വിജയകരമായി പൂർത്തിയാക്കി കണ്ണൂർ കിംസ് ശ്രീചന്ദ് ആശുപത്രി. ജില്ലയിലെ അഞ്ചും ഏഴും മാസം പ്രായമുള്ള രണ്ട് പിഞ്ചു കുഞ്ഞുങ്ങൾക്കാണ് ഈ സങ്കീർണ്ണ ശസ്ത്രക്രിയ വിജയകരമായി പൂർത്തിയാക്കിയത്. വടക്കൻ കേരളത്തിൽ ആദ്യമായാണ് ശസ്ത്രക്രിയ നടക്കുന്നത്. തലയോട്ടിയിലെ അസ്ഥികൾ നേരത്തേ ഒന്നിച്ചുചേരുന്നതിലൂടെ ഉണ്ടാകുന്ന ഈ രോഗാവസ്ഥ കാരണം തലയുടെ ആകൃതിയിൽ വ്യത്യാസം, മുഖഭാഗത്തിലെ അസമത്വം, കണ്ണുകളുടെ സ്ഥിതിവ്യത്യാസം തുടങ്ങിയ പ്രശ്നങ്ങൾ പ്രകടമാകാം. നേരത്തേ തന്നെ ശസ്ത്രക്രിയ നടത്തുന്നതിലൂടെ കുട്ടികളുടെ സ്വാഭാവിക വളർച്ചയും രൂപവുമെല്ലാം മെച്ചപ്പെടുത്താൻ ശസ്ത്രക്രിയയിലൂടെ കഴിയും. പ്രമുഖ പീഡിയാട്രിക് ന്യൂറോ സർജൻ ഡോ. മഹേഷ് ഭട്ട്, ഡോ. ഷിനാസ് ഹുസൈൻ, അനസ്തേഷ്യ ആൻഡ് ക്രിട്ടിക്കൽ കെയർ വിഭാഗം ഡോ. എ.കെ ഫയാസ്, ഡോ. വി. വിപിൻ രാജ് എന്നിവരാണ് നേതൃത്വം നൽകിയത്. വിദേശപരിചയം ഉൾപ്പെടെ സമ്പന്നമായ വൈദ്യപരിചയവുമായി കേരളത്തിലേക്ക് മടങ്ങിയെത്തിയ ഡോ. മഹേഷ് ഭട്ട് നിലവിൽ കണ്ണൂരിൽ തന്നെ ഉയർന്ന നിലവാരത്തിലുള്ള പീഡിയാട്രിക് ന്യൂറോ സർജറി സേവനങ്ങൾ നൽകുകയാണ്. മുമ്പ് മുംബൈയിലോ വിദേശരാജ്യങ്ങളിലോ മാത്രം ലഭ്യമായിരുന്ന ഇത്തരം ശസ്ത്രക്രിയകൾ കണ്ണൂർ കിംസ് ശ്രീചന്ദ് ആശുപത്രിയിൽ ലഭ്യമാകുന്നത് രോഗികൾക്കും കുടുംബങ്ങൾക്കും വലിയ ആശ്വാസമാണ്.
കിംസ് കേരള ക്ലസ്റ്റർ സി.ഇ.ഒ ഫർഹാൻ യാസീൻ, യൂണിറ്റ് ഹെഡ് ഡോ. സുബിൻ ജോസഫ്, പ്രമുഖ പീഡിയാട്രിക് ന്യൂറോ സർജൻ ഡോ. മഹേഷ് ഭട്ട്, ഡോക്ടർമാരായ എ.പി ഷിനാസ് ഹുസൈൻ, എ.കെ ഫയാസ്, വിപിൻ രാജ്, എം. വിദ്യ, ആശ വലിയവീട്ടിൽ, കാർത്തിക് ഹരിശങ്കർ, ജി. അശ്വിൻ എന്നിവർ വാർത്താസമ്മേളനത്തിൽ പങ്കെടുത്തു.
Kimssreechandhospital
